علي الطلاق تمشي

0
علي الطلاق تمشي

جيت قاطع الظلط برجليني وهو عايز يتفاداني بعربيتو وأنا إترددت وقفت وتاني مشيت خطوه هو وقف، المهم إتلبشنا الإتنين، قام وقف العربيه تماماً، قلت ليهو إتفضل قام بزهج كدا قال لي ما تمشي ياخ إنت أهبل؟ قلت ليهو خلاص أمشي إنت، قام بنفس النبره الحاده ديك قال لي لا علي الطلاق تمشي إنت، قلت ليهو أقول ليك كلام الليله إلا تطلق ، أنا ما مااااشي من محلي دا، قال لي يا ود الناس عليك الله أمشي ما تضيع زمنا وتوقف الشارع، قلت ليهو أنا موقف الشارع؟ إنت الموقفو، أها الناس من وراهو بدت تضرب في البوري والزحمه كبست والناس تأشر بيدينا وفي ناس بدو يسبو ليهو وأنا واااقف في طرف الظلط وطلعت تلفوني نظام مشغول وكدا، والشارع وقف، الناس إتلمت وجاء العسكري بتاع المرور قال ليهو يا زول ما تتحرك، قال ليهو الزول دا ما داير يقطع، العسكري قال ليهو يا زول إنت مسطول؟ مالك ومالو ما تمشي، قال ليهو والله يا جنابو أنا حالف طلاق، العسكري مات بالضحك، إنت يا زول مجنون طلاق شنو في نص الظلط؟، والشارع كتم، أها بدو يحنسو فيني يا إبن العم ياخ الراجل دا ما عايز منك حاجه غير تمشي قدامو بس، قلت ليهم أقول ليكم كلام؟ أنا خليت مشواري زاتو وراجع، عمك عرقوبقي شغال إعتذارات وتحانيس عليك الله يا شاب إنت راجل ظريف كدا وأنيق تخلي أخوك يطلق مرتو؟وعمك يشيل ويكسر لي في التلج، وبدا يعرق وخشمو نشف عديل، ياخ أنا سمعت أوصاف فيني لمن قربت أصدق زاتو أشيل وأعاين في روحي هههههه، يا أنيق ويا وجيه ويا راقي ويا دكتور ويا سعادتك، والناس تحنس وجا بتاع الدكان وشباب من الجامعه كدا وعسكري المرور وناس نزلو من الحافله، بس في عز الجوطه ديك ما أحس ليك بروحي إلا وأنا محمول علي الأعناق فووق التقول فيصل العجب لمن فازو ببطولة الشامبيون ليق وهوباااا شالوني ليك فووق وجرو بي قدام العربيه وقطعوني الظلط، ياخ منظر عجيب كان، كان مهرجان شعبي، والطلع موبايل وبصور.
في اللحظه ديك صحبك دور عربيتو وقام مشتت بنمره خمسه والعجلات إتزلقت مسافه في الظلط أظنو ما نزل فرملة اليد، وقال لي كلمه كدا ما سمعتها كويسالمهم ضحكت وقلت ليهو تاني لو راجل أحلف طلاق يا أهبل.
ياخ ما وجعني إلا واحد إتصور معاي سيلفي وأنا في الهواء فوق. ياخ الناس دي غريبه خالص.
*عليكم الله تاني ما تحلفو طلاق

الكاتب رشاد عبدالله

المزيد من المقدمين …

Image: Rwebogora

Social Jobs